我喺呢栋楼做咗十几年，梗係睇到咗好多嘢喇！同埋我哋呢栋楼都住咗好多人物咯！好似15楼嘅俞生同俞太喇！我记得最早，係俞生一个人住喺度，嗰时佢仲好后生喈！有时朝头早出去夜晚返嚟，有时就夜晚出去朝头早先返，有时就根本冇返，我都唔明佢做嘅係乜工。直到有一次夜麻麻，有班僆仔喺大堂撩个后生女，我识嗰个后生女喈，咪18楼嗰个唔识讲嘢嘅朱小姐咯，我咪出嚟制止咯，佢哋就过来推打我，好彩嗰时俞生返嚟，佢即刻摞张警员证出嚟问佢哋做啲乜，佢哋话一场误会跟住走埋，我先知俞生原来係当差嘅！佢扶我起身，又问我使唔使去医院验伤，我话冇事喈。后尾我哋不时都会倾下计喇，佢话佢喺寰头行Beat，有时当夜更，有时放假返去探阿爸阿妈咪唔喺度住咯。等我之前睇佢咁大只，返工又唔定时，仲以为佢係帮人收数添，真係好大嘅误会。　　喺度住咗几年，有天夜麻麻俞生带个女仔返嚟，之前个女仔都嚟过，但无过过夜喇，至少我守夜更嗰时都无睇到佢喺度过夜。但嗰日开始佢就喺度住喇，同俞生同进同出咗个来月后，个女仔连家都搬埋，我一直以为佢哋係男女朋友同居喈，点知到派信嗰时先发觉原来佢哋住隔离单位，个女仔姓苏，不过个名就似男仔多啲咯。　　苏小姐搬嚟哩度差唔多一年，俞生就冇再出现了，但又无退租无转地址，啲账单都成寸厚信箱装唔落了，我唔知俞生同苏小姐係咪散拖，咪问苏小姐有冇见过俞生，佢就话冇。点知后尾冇几耐，佢又摞俞生信箱嘅钥匙将啲信取走嗮！　　后尾差唔多过咗有半年，俞生先返嚟，我仲记得佢返嚟嗰日落紧冻雨，不过佢居然睇唔到嘢了！之后听苏小姐话，佢係做嘢整亲嘅！唉，当差其实都几危险。话係话，俞生屋企原来都几有米，佢返嚟之前，就听15楼嘅其他住户话签咗新租约，后尾我哋大堂了，后楼梯了，都铺埋啲橡胶盲道，原来佢屋企买下15楼整层喇！跟住俞生都有一排冇得返工，成日车接车送，仲有个私家看护陪住佢，佢话返紧学重新来过。唉，咁后生就睇唔到嘢，真係几阴功咯！不过苏小姐又真係唔话得，俾咗第二个，梗係成早同俞生散咗喇！佢仲成日放假都陪住俞生，有次仲拎咗几尾鱼话係佢哋钓嘅送我。係了，记得俞生以前好似讲过苏小姐係佢同事嚟架，后尾我有一次当夜更时心脏好唔舒服，昏咗过去，都係苏小姐经过急救，又帮手call白车送我去医院嘅，讲起上嚟，佢哋两个都係我救命恩人喈。　　俞生睇唔到嘢差唔多一年后咯，都係冬天喇，不过嗰排天气又几好，一啲都唔冻，俞生同苏小姐成日都笑意甚浓，唔係话佢哋之前唔好，但嗰排两个人嗰种感觉都係让人觉得好事近了，无几耐，佢哋真就拉埋天窗了。啲兄弟团可能係俞生嘅旧同事，个个都人高马大，着老西一team睇过去都几有台型，苏小姐我就头一次睇佢着到咁靓女喇！后尾我再见返佢，都叫佢俞太咯！佢哋仲派咗盒喜糖俾我添。　　后尾俞太嘅肚就愈嚟愈大了，日日都见司机车佢哋返工，听讲嗰时俞生已经喺特殊学校做体育教师。虽然睇唔到嘢喈，佢睇落去仲係好好睇睇，加埋嗰时要做人老豆，心情都令舍靓啲！俞太后尾休咗产假，佢哋就唔喺度住了，听讲係返俞生屋企，方便生养。等佢哋返嚟又差唔多半年后了，仲带埋个bb女添。跟住又一排唔见俞生，得返俞太同工人司机出出入入，我咪问佢哋了，俞太话俞生又返医院做手术了，跟住急匆匆走咗去。　　再多三个月俞生返咗嚟，今次就好大唔同咯，佢又睇返嘢了！佢仲话我嘅制服唔同咗添，又真係几好记性。跟住又成日见俞生架住佢哋嘅女喺自己条颈度，俞太次次都要嗌小心，睇怕仲係好担心老公对眼有事。未够一年，又唔见俞生喺度，我都几惊佢对眼又有乜事，入返医院。再问俞太，佢一边逗自己嘅女嗌我公公，一边慢悠悠嘅睇信，话俞生入咗camp，好似係乜做返警察前嘅训练，跟住同我笑笑，带埋工人返屋企了。俞生对眼冇再出事就好咯，不过咁都要做返警察，佢又真係好中意当差喈！　　后尾再见俞生嗰时，又比之前黑瘦精壮咗好多，不过人就几精神咯！问佢，佢都话已经辞咗教师份工，重新当差了。于是又见到佢哋似未结婚嗰时咁，俞生日日车俞太返工，佢哋嘅司机同工人就喺屋企凑住个bb女喇！　　虽然俞生俞太结咗婚都快十年了，係喇，佢哋嘅女都返小学了，我都唔係好清楚佢哋宜家喺乜寰头乜部门做嘢，净係见佢哋成日同进同出，点知呢排睇新闻，睇到俞生受勋喔！我一世都係头一次识到个受勋嘅生悠悠嘅人，仲要係我哋呢栋楼嘅住客，想必佢都喺差馆俾咗好多心机做嘢先得嘅，之前整亲到睇唔到嘢仲可以咁搏，俞生真係叻喇！加埋呢排又睇到俞太嘅肚大咗，俞生真係双喜临门喈！