【心心的话】　　　　今日礼拜六，返学返半晝，返到屋企，点知屋企居然冇人喺度。明明琴晚讲定daddy今日day off整萝卜牛腩俾我食嘅，除低书包入厨房，牛腩係整好咗，但係daddy就唔见，打俾佢都飞咗去留言。照计如果係佢差馆有嘢做，佢都会打俾我或者sent sms俾我嘅啊！可能都係临时有事喈噶~　　其实我都唔係好肚饿，咪惗住等埋daddy一起食咯。返房仲未执完书包，就有人call我，原来係同学Grace，话我漏低咗分组报告喺课室，佢顺路摞返嚟俾我，翻了下书包确实係啊，唉我又真係大头虾。咪拎住门匙拉拉声下楼咯，同佢讲咗多谢，仲惗住倾多阵，佢就话阿妈等紧佢食lunch，唔讲住喇~　　返上楼，出咗lift咁啱碰到A座嘅富公公，嗌咗佢一声，佢拉我到一旁神神秘秘问我，daddy宜家点样。我话我返嚟仲未见过daddy喔。佢就讲头先Iris姨姨唔係特登嘅，装修工人都唔係特登嘅，阵间见到daddy，劝佢唔好咁劳气喇，我都听到懵下懵下。仲惗住问清楚，装修工人又嗌富公公，佢就冇时间睬我了，我咪返屋企咯。啱啱执定书包，就听到开门声，係daddy返咗嚟喇。睇佢摞住个纸袋，我问佢头先去咗边，佢就话去配相框，跟住话开饭了。我睇佢都冇嘢呀，唔知点解富公公头先咁讲。　　食咗lunch，daddy叫我唞一阵，晏啲返大宅探阿爷嫲嫲，跟住睇佢就拎住个纸袋去书房。惗起miss话下礼拜三要开家长会，我咪跟过去同daddy讲，就睇佢喺度挂相片，係佢同mummy嘅婚纱照喔。啲相平时佢好少除落嚟嘅，问佢做乜今日抹相片，佢就话上晝隔离嘅装修工人做嘢几论尽，整到啲相跌咗落地下，仲跌烂咗mummy亲手拣嘅相框。唔怪得之富公公要我劝daddy唔好劳气了，mummy係daddy嘅死穴喈嘛，我劝都唔一定有用噶！同daddy讲咗家长会嘅事，佢就应承我一定会去。係呀，佢如果唔去，mummy又唔喺度，都无第二个人去了。　　睇嗰张婚纱相，mummy以前讲过俾我知，影相嗰时我已经喺佢肚入面了，后尾上生理卫生堂我先知，原来daddy同mummy都算係“先上车后补票”。Daddy就同我讲过影相嗰时佢对眼仲未好返，其实係睇唔到嘢嘅，但睇落去我都睇唔出啊，daddy几时都係咁型仔。睇到啲相其实我都有小小挂住mummy喇，佢同细妹走嗰时，我先读小三，家下我都读中三了。惗起以前mummy带我返围村食盆菜，玩捉依因，睇舞龙舞狮，都几热闹几开心，仲有我哋背住daddy一起食榴莲呀。虽然daddy宜家都有买俾我食，但佢自己就冇食，以前笑姐喺度有时仲会同我一起食，但佢退休返乡下以后，屋企得返我一个人食喈。仲有我好中意mummy整嗰味榴莲飘香鸡，佢唔喺度，笑姐都整唔出嗰只味，我都冇再食过咁好味嘅了。　　其实我知daddy比我仲挂住mummy，年年mummy旧历牛一，佢都会整几味餸自己一个人去睇mummy，就算我放假都唔带埋我去，有年佢送我返阿爷嫲嫲度，有年就送我去契爷度。次次佢嚟凑我，我都睇到佢对眼红肿肿嘅，虽然有时佢特登戴住墨镜，我都睇到。　　Mummy啱啱唔喺度嗰时，我都唔明乜嘢係“死”。我成日都以为，佢好似我读幼稚园嗰时一样，去公公婆婆度读一年书就会返嚟。但我就唔明点解佢要带住细妹去，唔带埋我，其实我都好想喺英国住成年嘅喈。后尾大个啲，mummy同细妹都冇返，我先知佢哋係一世都唔会返嘅了。　　有几次我喺大宅，听到阿爷同嫲嫲讲，daddy应该搵返个老婆返嚟，睇住头家。嫲嫲就话，daddy係唔会拣第二个女人嘅了。我喺契爷度都偷偷问过契妈妈，佢就话呢啲说话千其唔好讲俾daddy听，唔係嘅话佢会好伤心嘅。　　其实，mummy唔喺度我都惯咗了。我都係大个女，都明咗人迟早都会死，净係迟同早嘅分别，父母就通常早过仔女过身。但惗惗下如果有一日daddy都唔喺度，我就真係一个人，就会好难过。所以，我要代mummy同细妹好好照顾daddy，唔好俾佢太攰太操劳。咪等daddy去瞓晏觉，我就执一执屋咯！