【一个人生活】　　　　“阿强，个女今日嫁咗了，你睇到嘛？女婿係台湾人，姓诸葛，我哋都叫佢鹏仔，係心心喺英国读U嗰时识嘅，不过佢宜家喺香港做嘢。上昼睇心心跪喺我面前，我个心又感动又酸酸啲，虽然我信鹏仔会锡心心，仲係会好唔舍得。咁大个女一路咁乖巧，又孝顺又用功读书，都係做咗别人嘅老婆、新抱，底时仲要做人阿妈，我先可以小小体会到你嫁俾我嗰时阿爸嘅心情。不过点都係要嫁嘅喇，冇理由留佢喺我身边一世，你话系咪啊？”忙完女儿的喜宴，洗漱过后，学礼靠坐于卧室床头，揸住文强的结婚戒指，呢喃道，“心心愈大愈似你，今日着婚纱，都几似你嫁俾我嗰时喈，不过佢无陀住个bb喇，放心，我唔会俾人咁样虾我哋嘅女。不过咁样讲又好似以前係我虾你哎～老婆，真係对唔住。”　　“佢哋听日要去度蜜月，去马尔代夫。惗返起其实我一直争你一个真正嘅蜜月嘅喈。我哋结婚嗰时，你有咗心心，蜜月我哋都冇去到。后尾心心出世，跟住我又返去医眼，就算对眼好返，我哋都係带住心心一起出去玩，都冇两个人再单独真真正正出埠一次，最多都係daddy mummy或者家姐帮我哋睇住心心，我哋喺附近行下。你又惊个女挂住我哋，都冇惗过自己，也都冇同我抱怨过呢样嘢。你啊，真係个好女人，但我就係个不合格嘅老公，到最尾都无睇住你，sorry啊……”　　“心心嫁咗，屋企一下子真係静咗。虽然佢之前出去读U，都係唔喺屋企，但都知佢最终会返。今次嫁咗，做咗人哋嘅太太，有咗自己嘅小家庭，再返嚟都係返娘家，一切唔同嗮了。”　　“屋企一路冇搬过，从我哋结婚，打通BC两间到宜家，住下又真係好习惯。唔知你有冇返嚟过咧。客厅你中意坐喺度睇书嘅角落，傍晚都仲係晒到太阳，不过张沙发就换咗了，太残了。”　　“间屋咁大，宜家一个人住，真嘅惊自己习惯唔到。心心系话过叫我搬去同佢哋一起住，我点会去喇？后生仔女梗系希望过下二人世界喈，好似以前我哋喇，我先唔会咁唔通气跑去做电灯胆～我惗可能都係搬返去陪妈咪噶，爹地唔喺度了，佢一个人住都几咁寂寞喈。我应该下个月会住过去了，同你讲声了，如果你返嚟，揾唔到我同心心，唔使惊，返妈咪嗰边嘅路你识嘅，心心屋企等佢哋蜜月返嚟我带你去。”　　“惗惗下时间都几快，你同个女走咗都成廿年了，如果细女都喺度，宜家也都读U了，过两年都可以参加佢毕业式了。如果你都喺度，今日一定都好开心，不过都一定会喊。人哋话嫁女似割咗旧心头肉，我哋嘅心头肉都俾割咗了，哎～”　　“前两日梦见你，都係我对眼出事嗰时你喺警政大楼讲嘅说话，你话，如果出事嘅係你，你咁样呃我，我会点惗。……其实我知，你唔会呃我嘅，就算你呃我，我都唔会放弃你嘅喈。不过，你都唔知，嗰时我好庆幸有事嘅係我唔係你。”　　“老婆，你啱啱走嗰时，我有惗过如果唔係心心话要去主题公园，可能你就唔会有事。其实我一路都唔知，你嗰时有冇怪我，嗰时如果我护住你，可能有事嘅就唔会係你。我一路都想知又唔够胆问，我惊问咗你会嬲我唔锡心心，我冇，佢係你同我嘅女，我点会唔锡佢喈？但我都知呢啲嘢系冇得计嘅。惗返起以前嘅事，我真係争咗你好多嘢，我成日以为啲嘢係有得还嘅，等心心大个咗，嫁咗，我仲有一世时间陪住你，对你好，但原来唔係，我仲累到心心冇咗个阿妈，係我冇用，係我对唔住你哋两母女。”　　“虽然心心嫁咗，我都会继续代你睇住心心，俾埋你俾佢嘅爱佢，你放心了。记得得闲多啲返嚟睇下我啊，我好挂住你！”