作者有话要说：你是个笑里哭醒不再重复的梦Now that we're living separate lives.　　8楼护士观察记 special【你是我的眼】　　　　嗰年圣诞阿娟结咗婚，未过旧历新年，佢就转到A&E去了。冇几耐我都生咗大仔Aubrey，喺屋企唞过产假先返工，后尾除开间中喺teen撞翻，我哋都好少联络了。佢走咗，咪唔使帮佢执埋啲手尾，又都几好，不过啲八卦我就听少咗好多。　　隔咗年几，我又生埋阿女dice。唔经唔觉，仔女大个咗，老公嘅律师楼又搬咗，自己都做埋护士长，好多以前嘅事，唔係特登去提，都冇乜印象了。嗰个旧历新年我哋一家去大溪地玩，原本要到初五先返，点知喺电视上睇到主题公园爆炸，医院急call所有休假人员返去帮手，我都提前返咗，啲机票都好紧张，老公同仔女冇办法改签，都係按时先返了。　　忙完嗰排出咗正月，有天下晝喺teen饮嘢顺便等埋老公嚟车我，居然撞到好耐冇见嘅阿娟搭台。佢就顶住对曲奇饼咁大嘅黑眼圈，话从大年初一值班到宜家成个月都未唞过，真係攰到想死，仲要两点几先食得lunch。我咪问佢，点讲都喺A&E做咗咁耐，点会仲唔惯？佢就冇厘神气摇摇头话A&E不嬲忙到毙，出咗个爆炸案，忙得仲犀利，仲有呢班乜鬼新人，做嘢咁多甩漏，佢就冇一日唔使俾人激亲。我咪劝下佢，新人点都会有乜唔妥了，你初初入嚟都係咁喇。如果个个下下都做到咁尽，呢个世界都几完美，不过都净係可能係发梦咯。佢sent咗个白眼我，打咗个哈欠一路食住嘢一路同我倾住，係了，佢忽然提到个旧人，话以前喺眼科住咗好耐又几靓仔嗰个俞sir同佢个女都喺爆炸现场，嗰日都送入嚟急救，不过都冇事。我话我返嚟都撞返过佢，佢嚟摞啲检验报告，听讲佢以前嗰次睇唔到嘢，都係喺爆炸现场做嘢整亲嘅，今次无事都算好彩了。跟住阿娟又神神秘秘同我话，听嗰时送佢入院嘅救护员话，虽然佢同个女都冇乜嘢，佢太太已经喺爆炸入面过咗身了。我皱皱眉话应该唔会噶，早几日佢嚟摞报告嗰时，我都有问佢俞太近排点嘛，佢话俞太同个细女一起啊，梗係啲救护员搞错咗，话嗮嗰日喺爆炸现场咁多人。跟住阿娟嘅call机又震埋，佢餐饭都未食完就返A&E做嘢了。　　讲起俞太，其实我哋都好耐冇见了。俞sir嗰时喺我哋医院嘅手术都未算成功，又去到美国医病，都未好返，后尾都係返嚟我哋医院，定时复查做埋啲辅助治疗。Madam都一路陪住佢，周不时同佢嚟试下啲新药，佢哋结婚嗰时仲派埋啲喜糖俾我哋。点知跟住有一排都係个高高瘦瘦嘅男仔同俞sir嚟复诊的多，都有耐未喺我哋眼科撞返madam了。嗰时我仲惗，唔通madam同俞sir结婚净係为咗分身家，话嗮以前都听阿娟话过，俞sir屋企喺浅水湾嗰度，假假啲都算乜十大富豪了，咁都唔使咁快反面哪，啱啱拉埋天窗就dump低个老公唔理，俾丢低嗰个又几阴功咯。惗返起俞sir啱啱入嚟我哋医院嗰时，madam就同佢闹过分手，都算有嗮前科嘅……唉，条路点行都係啲后生仔女自己拣嘅，呢个世界就冇嘢唔使俾代价咯！　　后尾我喺产科做产检，撞返madam，先知我都係惗埋一边，佢话啱啱验出有咗，俞sir就讲医院咁多传染源，咪唔俾佢陪住咯。咁俞sir话嘅又错唔嗮，如果唔係喺度做嘢，我都唔想陀住个b仲日日返医院噶。跟住见返madam都係俞sir参与嗰个新药计划最尾成功咗，佢仲带埋个女嚟见阿爸添，个细路女又生得好鬼精灵，大大眼仔就似老豆，皮肤白雪雪又似阿妈，仲一啲都唔畏生添，我哋班姑娘都抱过佢喇！俞sir屋企冇几耐仲捐咗一大笔俾我哋眼科嘅基金帮助啲经济困难人士，佢哋一家三口仲同我哋影埋相添！　　跟住都有排无见到madam了，睇怕都係凑女唔得闲喈，不过俞sir仲係好准时咁返嚟复诊，我哋Doctor Lam都话做医生咁多年睇过咁多症，俞sir算係模范病人了。有一日喺屋企check咗阿仔同女女嘅作业，啱啱开电视睇晚间新闻，居然睇到俞sir授勋喔！我咪叫咗老公嚟睇，话呢个阿sir都係我哋医院医好嘅。点知冇耐，老公sent咗个link俾我，居然係俞sir同乜新闻主播搞乜车震，仲连啲嘴嘅相都影埋！唉，唔通男人发达咗就整个人变嗮？就算要偷食，小心点都得噶！啲周刊报纸登嗮，低登同港讨讨论区都咁多post，我呢啲年中都未睇三五条八卦嘅街外人都睇到，唔知madam几hurt几嬲先得噶！点讲madam嗰时陪住俞sir咁耐，都几唔容易噶！惗惗下都係同老公讲，底时阿女揾男朋友，我哋都係要帮眼睇过先得，啲男仔家世有米又好，高大靓仔又好，内里个良心如果烂嗮，真係不如揾旧叉烧！　　后尾冇耐我摞啲病人会诊资料落产科，居然又撞返madam同俞sir，madam个肚睇落去都几大了噶，唔通为咗箍实个老公先喺咁嘅年纪再生多一个？唉，啲乜鬼豪门生活真係几咁复杂！好彩佢哋都未睇到我，如果唔係，我都唔知係咪应该讲啲祝福嘅应酬说话定係戥madam唔抵喈！　　嗰年清明都算是历年最热，天文台报有卅几度。老公陪我嚟坟场度拜完阿妈，我睇个天咁热，同埋守喺临时休息站嗰班手足咁唔得闲，咪叫佢带阿仔同个女返去先，我留低帮手。差唔多下晝四点度，远远望见一个男人抱住个人由上山斜路嗰边行落嚟，啲人流咁逼，佢都几咁辛苦先挤到我哋休息站，条气仲未唞返顺，即话个女中暑咗。我哋俾个细路女躺平，用冷毛巾帮佢抹身，又开住电风扇细细风帮佢散热，冇几耐佢就醒返了。老豆睇个女冇嘢，先识得抹抹额头嘅汗，抬头同我哋讲多谢，我先发现居然係俞sir！摞咗两只凉茶俾佢同个细路女，戥佢哋唞多阵，睇个细路女个样又几似madam，係了，佢哋落咗嚟咁耐点解madam都仲未到嘅，我咪问俞sir，madam係咪喺屋企凑女今日冇嚟到？点知俞sir听咗我嘅说话，块面仲难睇过头先佢抱住个女落嚟嗰阵，低头吸返啖气，佢跟住低声话，唔係，佢哋今日係嚟探俞太嘅，个细路女啱啱坐起身饮水，都细细声讲咗句，仲有细妹。点解咁突然嘅？我唔够胆相信，早排佢到医院摞报告到宜家都未够三月个喈！俞sir个手捉到只水樽变嗮形，佢话，係过年嗰次爆炸，俞太同个未出生嘅女都……我先明白嗰时佢话俞太同细女一起係乜意思，只得匆匆同佢讲句节哀顺变。嗰时出边有把女人个声音嗌俞sir个名，俞sir转头应咗句家姐，话个女冇嘢了，跟住又转头同我讲佢哋走先，带埋个细路女又谢过我哋，起身走咗。睇落去俞sir都几伤心嘅，老婆同个未出世嘅bb都走咗，惗返起旧年睇到嘅嗰啲八卦，唔知佢有冇后悔madam在身嗰时，未够专一对佢。唉，呢个究竟係个乜世界嚟架！