【8楼护士观察记3】　　　　828房嘅阿sir第二次手术终于效果都几好，都话后生仔恢复快了，先无多几日，啱啱除低纱布就睇到嘢。不过佢琴日从早晨到太阳落山，一直到夜晚查房，都好似等紧人，又未等到。佢屋企人成早就嚟睇佢，咁佢等嘅梗係第二个喇。　　“俞sir，等女朋友啊？佢琴日冇嚟到嘅？”上次嗰个madam呢排成日嚟睇佢，仲时不时带埋自己整嘅便当嚟，係喇，其实病人恢复成点，唔单只医生同姑娘嘅照顾重要，屋企人同朋友嘅关心支持一样好紧要嘅，俾多啲关心病人，病人先有信心好返嘅嘛。　　“係啊，佢琴日有嘢做，唔得闲嚟。”俞sir同我笑笑，紧紧捏住个电话，嗰啲眼神等我觉得手机屏幕要俾佢睇穿咗。　　“啊，俞sir，你对眼啱啱好返啲，其实啲电子产品都係少用好啲喇。”虽然知你肉紧，但係我哋做护士嘅，都有咁嘅责任去提醒返喈，费事迟啲又盲咗，条女又飞咗你喇。　　“我明嘅，唔该嗮！”俞sir又係笑笑，但佢跟住抚摸电话屏幕，嗰个眼神又咁鬼sweet冧人，睇怕佢都係好中意佢女朋友喈！都唔知点解嗰个madam之前要闹分手，俞sir睇落去家世又几好，人又靓仔，又冧佢~不过，感情嘅嘢係咁了，一个巴掌唔响，强扭嘅瓜唔甜咯。　　“俞sir，呢啲係你嘅药，我摆低喺度，你食咗lunch记得食喇！”将药盒核对无误，放低在床头柜上，转身的时候不着痕迹地瞥了一眼，唔，净係好普通一张合影，不过嗰个madam靠喺俞sir膊头瞓着，好似喺啲巴士或者轮渡度，其实两个人係咁嘅喇，感情好嗰时，只要係埋一起，喺边度，做乜嘢，都觉得好开心。係了，俞sir喺医院住咗咁耐，其实应该都几寂寞啊，除开上次偷跑出医院去差馆见嗰个madam，佢后尾都无出到去。其实宜家天气咁好，佢都应该几想出去行下，去海边玩下，游下水行下山喈。　　“咁俞sir，我出返去先了，你如果有乜事，按铃得嘅了！”虽然对眼係好返啲，佢只脚都仲係要换药，好在问题唔大。惗惗下佢又真係好紧嗰个madam喔，睇唔到嘢仲要摸到后楼梯去睇佢喺边度出咗事，都唔知如果嗰时再整亲个脑点算。　　　　分完药回护士站嘅路上，就睇到嗰个madam嚟咗，佢笑笑同我打招呼，又好似笑意未达眼底，都可能係担心自己男朋友吧？本来我想话佢知俞sir对眼好返，但刚啱819病房病人嘅家属拉住我讲嘢，我净係同个madam笑下就俾拉走问啲复健嘅事了。　　原本都奇怪点解咁少人嚟睇俞sir，结果今日就真係嚟咗好多人，唔单只佢女朋友嚟咗，头先自己喺护士站，就睇到一班高大男仔带埋果篮经过，入面有一个高高瘦瘦嘅咪都成日嚟睇佢嘅男仔。后尾自己几次行过828病房门口，都听到入面讲笑讲嘢几大声喇。不过又未有其他病房病人投诉，自己咪多一事不如少一事咯！　　　　【8楼护士观察记4】　　　　讲起来自己今日淤爆，下晝派药嗰时，听到828房入面有把女声嗌得好大声，讲埋啲轻啲，好痛，顶唔顺之类嘅说话，自己惗歪咗，以为俞sir同佢女朋友喺病房搞啲乜嘢。话嗮都係医院，俞sir仲未完全好返，后生仔女猴急狼死自己可以理解，但家下都唔係啱嘅timing喇，自己咪敲敲门即刻推门入去，点知原来俞sir喺度帮佢女朋友搓药酒。好彩自己未讲住，先摆低药，反正人都入嚟咗，咪问多两句咯，唔係嘅话就咁走咗去都几尴尬喈。　　“啊俞sir，madam冇事吧？”睇佢块面又几痛苦嘅样，睇俞sir嘅身型，落手想必都唔轻了。　　“冇事，做嘢整亲喈！”俞sir块面不嬲都笑口咧咧，今日偏偏铁青色，睇落去又几得人惊。佢不停帮佢女朋友搓手臂，后生女仔白净手臂上确实青咗一大旧，都几阴功喈！　　“咁你哋慢慢，我出返去先，如果有事，按铃得嘅了！”自己讪讪同佢哋道别转身，跟住又听到madam嗌咗一声:“俞学礼你细力啲喇！真係好痛啊！”　　“唔大力啲点会好啊？仲着件长袖衫嚟扮冇事？边个人30几度天仲着得住长袖衫啊？我识你咁耐都唔知你咁耐热嘅！”啊俞sir入咗院咁耐，真係好少听到佢咁讲嘢喔，尤其係对住佢女朋友。之前madam嚟探佢，后尾医生话俞sir可以多出去行下，适应自然光线，madam咪陪佢落去花园咯，经过护士站都成日听到俞sir撩佢，肥咗喇，锡一啖喇，把声唔係好大，但鬼叫自己自细生咗对顺风耳，后尾又喺临终病房做过一排，对人讲嘢声音另舍敏感。惗返老公上次话俞sir喺差馆讲嘅嘢，原来佢睇落去都唔似表面咁老实嘅。　　“咁我自己搓得嘅喇！自己几大力你又唔係唔知！”madam好似俾人虾紧咁，啊madam其实你男朋友都係着紧你喇，淤血唔搓唔会散嘅喇！　　“到底係边个整亲你喇，掌门定贱仁了，下次我帮你捶佢！”啊唔知madam喺警队乜部门做嘢了，睇落去又白白净净几靓女，唔係应该去警民公共关系科咩？呢啲部门同事嘅花名都咁奇怪咩？　　“话咗唔使你理了！药酒俾返我！”Madam其实你男朋友真係好紧你啊，不过佢咁大只，你呢个整亲你嘅同事睇怕都唔慌好结果喇！　　“用嗮喇，唔紧要，我locker有，你听日自己去摞喇，嗰锁密码係你生日！”帮佢哋带上门，自己都係继续去派药喇，次次睇到佢哋两个係埋一起，但好似煲啲电视剧喇！但係可以去locker摞，原来佢哋係一起做嘢喈？咁下次睇警讯要认真睇下有冇佢哋出现了。　　讲起又係，俞sir前排仲帮保安科拉到个匿埋洗手间偷嘢嘅小贼，又帮我哋伤健共融嘅义工同呢层嘅病人讲啲安全知识课。係了，嗰日lift无啦啦坏咗，刚啱俞sir去花园返嚟都喺lift入面，同lift除开啲病人家属仲有一个大肚婆，俾韫lift惊到呼吸困难，都係俞sir帮手做急救稳住佢情况，唔係嘅话佢真係将个bb生喺lift入面了。后尾嗰个大肚婆同佢老公仲抱着bb嚟探俞sir，俞sir就话好小事係自己本分喈，但又係咁逗个bb。俞sir份人真係好热心！　　　　【强的心语】　　　　——这屋子里有太多你的好，恐怕一生都不敢去打扫，我原来是你手中的宝　　　　这日day off，原本惗住一早去医院看学礼，点知琴晚楼上嗰间嘅装修工人都有够大头虾，唔记得关水喉，一早醒返自己先发现大镬，跟住what’s app佢话朝早有嘢做去唔到，晏啲先过去。执屋执到几辛苦，点知又执出嚟好多嘢。上次嬲佢背住自己同Larine乱嚟，将衣柜里佢嘅衫、洗手间里的剃须刀刮胡泡沫等等若干物品都执埋纸箱入面扔回佢间公寓。点知原来仲有好多嘢上次未发现到，好似鞋柜大箱里冬天嘅男式大拖鞋，沙发底的几本足球杂志，买时贪得意硬係要买，买返嚟先发现一点都不实用跟住丢喺橱柜雪藏嘅情侣水杯……其实他都几着紧自己，依恋自己吧。上上礼拜生理期训练跟住就中了暑，俾同事送到医疗室唞下，记起旧年有一次都係咁，佢咪买咗啲凉茶俾自己，又跟前跟后，俾班手足笑到面红，都係支支吾吾又重复如是。有时觉得佢呢个人又几好气又几好笑。就好似前两日自己搏击训练整亲，佢帮自己搓药酒又真是落到重手啊，直头怀疑係咪佢报复紧自己上次喺洗手间唔俾佢乱嚟！　　原来自己唔多唔少都有小小担心，如果佢对眼好唔返会係点，虽然之前佢都算慢慢适应到暂时黑暗嘅生活，但如果有一日啊，真係睇唔到嘢，总部嘅假纸都无可能无限期的递下去。惗返佢上次话，之前嘅人生目标就係做飞虎，除开呢样嘢，其他嘢好多都唔识。仲有做第二次手术前，佢问自己，如果真係医唔返点算。其实自己心入面都无确切嘅答案喈，我都未有预知能力，又可以点算，咪行一步睇一步咯。或者都可以试下搵第二个人生目标啊，唔係有好多视障人士，都一样可以做到嘢，佢咁叻，体能又劲，点会唔得喈！不过佢就会有好多遗憾咯，会有好多嘢睇唔到，唔可以再睇ball赛同啲戏，但好似都有啲视障人士睇戏口述服务喈，或者口述ball赛一样都得噶！　　好彩佢啊都算上一世做得好事多，时运高，第二次手术恢复嘅效果咪几好咯！惗返上次佢讲嘅嘢，又仲係好嬲佢，咪问佢如果上次真係分咗手，啊跟住佢对眼好返，佢返嚟总部要点对住我，佢又支支吾吾转移话题，都唔知佢嘅脑到底係点惗嘢，真係俾佢激亲！！！　　点知嗰日我哋喺花园散步，医生话佢宜家就係要慢慢去适应啲自然光线咯，跟住有个好后生嘅妈妈抱住个BB过嚟同佢讲多谢，佢又抱住个BB撩佢喔，我都唔知发生乜事。后尾佢讲，上次自己落嚟散步，返病房时韫lift，个妈妈都喺部lift度，嗰时仲未生BB，一时呼吸困难，佢咪帮手做人工呼吸咯，仲问我佢锡咗第二条女，会唔会呷醋……真係好想重重拍两下佢嘅脑，又惊整亲佢，咪费事睬佢咯！跟住佢话，佢后尾惗，如果係我喺咁嘅情况俾韫lift，佢都希望会有人可以及时救到我。如果佢乜都睇唔到，以后我哋行落去，好多嘢係要辛苦我嘅，唔管宜家情况係点，佢都惗定咗，要为以后未雨绸缪，得闲学下点字，同埋多啲帮人，佢信人品守恒，福祸相倚嘅。都唔知佢乱嗡啲乜，又係自己一个人揸嗮主意，家下我係应承咗嫁佢帮佢陀B生仔女咩？婚都唔使求就咁蒙混过关，边有咁嘅执数摞啊，唔该你用下个脑喇！　　佢仲话之前煲嗰套剧未追完，要我帮手录低，好心你了俞大少，医生未讲你对眼完全好返嗮，唔该你唔好成日对住啲电子屏幕了，费事你下次又出乜事，又话要飞我，咁我唔担保係咪会俾你激到一脚踢你落楼！！！